म्याग्दी, भदौ ३ –म्याग्दी जिल्लाका
महिलाहरु मदिरा उत्पादन गर्न छाडेर गलैंचा बुनाई व्यवसायतिर आकर्षित भएका
छन् । जिल्लास्थित विभिन्न सरकारी तथा गैरसरकारी कार्यालय र संघसंस्थाको
सहयोग पाएपछि उनीहरु पुरानो पेशालाई परिवर्तन गरी नयाँ पेशातर्फ लागेका
हुन् ।
दुर्गम मुना गाविसकी मायारुपी पुन
वर्षोदेखि गाउँमा मदिरा उत्पादन गर्दै आउनुभएको थियो । दोवाकी तारादेवी
पूर्जा र ओखरबोटकी दलकुमारी पुनले पनि मदिराको आम्दानीले घरखर्च चलाउने
गरेका थिए । तर हिजोआज तीनै जनाको पेशा परिवर्तन भएको छ । हस्तकला
साम्रागीको तालिम लिएपछि उनीहरुले पुरानो पेशालाई त्यागेर गलैचा व्यवसायको
उत्पादन शुरु गरेका छन् ।
सरस्वती
एसपोर्ट एण्ड ईन्टपार्ट प्रालिले नियमित तालिम र राष्ट्रिय तथा
अन्तर्राष्ट्रियस्तरमा बिक्रीको व्यवस्थापन गरिदिएपछि उनीहरु दैनिकजसो
गलैचा बुन्नमा व्यस्त हुने गरेका छन् ।
मुनाकी मायारुपी पुनले भन्नुभयो,
‘मदिरालाई व्यक्तिगत आम्दानीको माध्यम मात्रै बनाएका थियौं, तर त्यसबाट
स्वास्थ्य र समाजलाई असर गर्नेतर्फ ध्यान दिन सकेनौं ।’ उहाँले हातमा सीप
भएपछि राम्रो आम्दानी हुने अन्य क्षेत्रहरू पनि फेला पर्ने गरेकाले गाउँका
महिलालाई व्यवसायमा आउने वातावरण बनाएको बताउनुभयो ।
यस्तै पिप्लेकी सरस्वती सुवेदीले ग्रामीण
क्षेत्रमा महिलाको जीवनस्तरमा परिवर्तन ल्याउन, मदिराको उत्पादन तथा बिक्री
वितरणमा लागेकालाई निरुत्साहित गर्न गलैंचा व्यवसाय शुरु गरेको बताउनुभयो ।
सरस्वती गलैंचा उद्योगमार्फत जिल्लाका विभिन्न गाविसमा पुगेर महिलालाई
स्वरोजगारमूलक तालिम दिन थालेपछि पिप्ले, भगवती, दोवा, दरबाङ, देवीस्थान,
मुनालगायतका गाविसका महिला यसतर्फ आर्कषित भएको उहाँले दिनुभयो । जनजाती र
दलितको बाहुल्यता भएको ठाउँका महिलाहरु मदिरा उत्पादन गर्ने गर्दछन् । यसले
समाजमा दीर्घकालीन असर पारिरहेको उद्यमी सरस्वती सुवेदीले बताउनुभयो ।
आर्थिक अवस्था कमजोर भएका महिलालाई प्राथमिकतामा राखेर तालिममा सहभागि
बनाएकाले गुणस्तरीय उत्पादन गर्न सकेमा मासिक २५ हजारसम्म आम्दानी गर्न
सकिने उहाँको भनाई छ । गलैंचा
उद्योगले जिल्लाभर करिब १ सय महिलालाई सीपमूलक तालिमसहित ३५ जनालाई
रोजगारी दिएको जनाएको छ । उद्योगले मासिक तलबस्वरुप १५ हजार रुपैयाँ उपलब्ध
गराउँदै आएको छ । महिला उद्यमीले तानमा बुनेका गलैंचाहरूलाई बजारसम्म
पु¥याउन हस्तकला महासंघ, डिमेगा, संगम म्याग्दीलगायतका संघसंस्थाले सघाउन
थालेपछि गलैचा व्यवसायमा लाग्ने महिलाको संख्या बढेको छ ।
सीप सिकेका महिलालाई तान, घरमै गलैंचाको
धागोलगायत आवश्यक प्राविधिक सहयोग गर्ने गरिएको संगम म्याग्दीका अध्यक्ष
दीपक पौडेलले बताउनुभयो । गाउँमा सीप सिकेका महिलाहरु आफ्ना छोराछोरीसहित
सदरमुकाम बेनी, गलेश्वर, पर्वत बेनीमा बसेर पेशालाई निरन्तरता दिइरहेका छन्
। आफूहरुले उत्पादन गरेको एउटै गलैचाबाट ४ हजारसम्म आम्दानी हुने गरेको
उद्यमी दलकुमारी पुनको अनुभव छ । जिल्लामा उत्पादित गलैंचा देशका विभिन्न
स्थानका साथै विदेशी मुलुक चीन, इण्डोनेसिया, हङकङ, जापान, मलेसिया
बेल्जियमसहित यूरोपका विभिन्न देशमा निर्यात हुन्छ ।
Post a Comment