‘ओ दाइ कहाँ जाने ? कीर्तिपुर हो ? ल ल
चढिहाल्नुहोस्’ बल्खु चोकमा रोकिराखेको माइक्रोबसका सहचालक कराए । ‘जाने त
हो, बस्ने ठाउँ छ र ?’ मैले सोधें । ‘जति भनेपनि छ ल आउनुहोस्’ उसले बोलायो
। पुग्ने बित्तिकै गाडी चढ्न पाइने भयो भनेर म मख्ख परें । तर बसमा बस्ने
ठाउँ त परै जाओस्, उभिने ठाउँ पनि छैन । ‘खै त ठाउँ’ मैले सोधें ।
‘यी के यहाँ’ ढोकामा एउटा खुट्टा मात्र
टेक्न मिल्ने ठाउँ देखाउँदै उसले भन्यो । दुईजना बस्न मिल्ने सिटमा
चारजनासम्म खाँदिएर बसेका छन् । कोही कक्रक्क परेर उभिएका छन् । कोही
झुण्डिएका छन् । गर्मीले उकुसमुकुस भएकाहरु लौन जाऔं भाइ भनेर कराउँदैछन् ।
तर भाइलाई अझै मान्छे पुगेको छैन । एउटा खुट्टा मात्र टेकेर गाडी चढ्न
सक्ने मान्छे खोज्दैछ ।
‘भाइ म यसरी त जान सक्दिन, खाली सिट भए
मात्र’ मैले भनें । ‘सिट त पाएको पायै हो दाइ, उतै रत्नपार्कबाट त मान्छे
उभिएर आएका छन्’ भाइले जवाफ दियो । म नटेरेरै पछि हटें । ‘सिटमा बसेर गएको
हेरौंला’ भन्दै भाइ अर्को आँटिलो यात्रुलाई ढोकामा झुण्ड्याएर हुईंकियो । म
ट्वाल्ल परेर अर्को बसको बाटो हेर्न थालें ।
अरुबेला अफिस नजिकै धोवीघाटबाट कीर्तिपुर
चल्ने बस चढ्ने गर्छु । लगनखेलबाट कीर्तिपुर चल्ने डल्लो खालको पहेंलो बस
मुश्किलले आधा घण्टाको फरकमा चल्ने गर्छ । पानी पर्दा हिलाम्मे र घाम
लाग्दा धुलाम्मे हुने सडक छेउ पुगेर उभियो ।
परसम्म आँखा तन्काएर हेर्यो । त्यहीबाटो भएर पूर्व छुटेका नाइटबस नागढुंगा
कट्नेबेला हुँदासम्म पहेंलो डल्लो बस आउँदैन । त्यो बस कुर्दाकुर्दा
पहेंलो रङ भएका स्कूलका सबै बस कण्ठ भैसकेको छ ।
ढोका खोल्नै नमिल्नेगरी मान्छे खाँदेर
ल्याएको डल्लो बस बल्लतल्ल आउँछ । ठाउँ नभएपनि मान्छे देख्ने बित्तिकै
रोक्छ । ढोकामा उभिएका दुई तीनजना अटेसमटेस गर्दै एउटा खुट्टा माथि सिंढीमा
झुण्ड्याएर कक्रक्क पर्छन् । बल्लतल्ल ढोका खुल्छ । अब त चढ्न पाइयो भनेर
उक्लियो, माथि जाने ठाउँ हुँदैन । यात्रुको भीडमा चेपिन लागेकाजस्ता चालक
कराउँछन्, ‘ल ल अलि पछाडि सर्नुहोस् ।’ ‘पछाडि त ठाउँ भए पो सर्नु’ चेपिएर
उकुसमुकुस भएका यात्रु कराउँछन् ।
‘ल ल दाइ ढोका चाहिँ लगाउनुपर्छ है
बल्खुसम्म, नत्र ट्राफिकलाई तिर्नुपर्छ’ चालक भन्छन् । बल्खुसम्मकै लागि
भएपनि ढोका नलगाइ नहुने । त्यहाँबाट कीर्तिपुर लाग्दा ट्राफिकले वास्ता
गर्दैनन् । ढोका लगाउनुपरेको ट्राफिकका लागि हो, यात्रुको सुरक्षाका लागि
होइन । चालक
र सहचालकले मात्र होइन, यात्रुले पनि यही बुझेका छन् । ढोका लगाउन नमिल्ने
भएपछि धोवीघाटमा सँगै डल्ले बस पर्खेर बसेका मोटाघाटा र महिला केटाकेटी
चढ्न सक्दैनन् । म लिखुरे चालकले जता गएर बस् भन्यो, उतै गएर उभिन सक्छु ।
बसभित्र बल्लतल्ल खुट्टा राखेर झुण्डिन
पाएकोमा म त्यसै मख्ख पर्छु । अब त १५ मिनेटमा पुगिने भो भनेर दंग पर्न
नभ्याउँदै अघिल्तिर गाडीको लामो लाइन देखिन्छ । ‘लौ कम्तीमा आधाघण्टा जाममा
फसिने भो’ अघिल्तिर चालकसँगै बसेका यात्रु बोले । थुक्क बेकारमा बस
चढेजस्तो लाग्यो । लगनखेलबाट चल्ने डल्ले बसमा धोवीघाटबाटै बल्खु पुग्न
आधाघण्टा, त्यो पनि हिँडेको भन्दा बढ्दा थकाई लाग्नेगरी । यसरी यात्रा
गर्नुभन्दा नगरेकै बेस । गाडीमा हुँदासम्म यस्तै लाग्छ । तर भोलिपल्ट फेरि
यसरी गाडी नचढी सुखै छैन ।
धोवीघाटमा बल्लतल्ल आउने डल्लेबस भन्दा त
बल्खुबाट कीर्तिपुर चल्ने धेरै बस पाउँछन् । पक्कै पनि खाली पाइन्छ भनेर
त्यो दिन सहकर्मी ऋतु थेबेसँग मोटरसाइकल पछिल्तिर बसेर बल्खुसम्म पुगेको
थिएँ । ‘ल तपाईंभन्दा म छिटो कोठामा पुग्छु’ भन्दै मख्ख परेर बल्खु झरेको ।
तर त्यहाँबाट पनि बसेर जाने बस पाउनै मुश्किल । ‘सिट पाएको हेरौंला’ भन्दै
ढ्यापढ्याप बनाउँदै मलाई खिसी गरेर हिँडेको सहचालक भाइ कीर्तिपुर पुगेर
मजस्तै अरुलाई बसभित्र खाँद्न भ्याइसके होला । म अझै बल्खुमा उभिएको छु ।
एउटा, दुईटा, तीनटा, चारवटा जति बस आएपनि
उत्तिकै भिड । राम्रोसँग बस्ने ठाउँ त छोडौं, उभिने ठाउँ समेत पाउन मुश्किल
। सिट पाए मात्र चढ्छु भनेर पर्खेको मैले अर्को बसको ढोकामै उभिनुपर्यो
। अघिको सहचालक भाइले देख्यो भने के भन्ला भनेर डराईडराई भित्र टाउको
लुकाएर उभिएँ । ‘यस्तो उठेर यात्रा गर्नुपर्ने गाडीलाई पनि के को बस भन्ने
उठ भन्नुपर्छ’ सँगै उभिएका अर्का यात्रुले ठट्टा गरे । उठमै पनि आनन्दले
उभिन पाए त हुन्थ्यो नि । लगनखेलबाट चल्ने पहेंलो डल्लेले कुराएर थकाउँछ,
अनि कीर्तिपुर बस्ने सबै ‘उठ’ले खाँदेर यात्रुलाई रुवाउँछन् ।
Post a Comment