​जगन्नाथ मन्दिरको जगैदेखि पुनर्निर्माण

म्याग्दी, साउन ७ – म्याग्दीको बेनी नगरपालिका–१२ गाजनेमा अवस्थित ऐतिहासिक महत्व बोकेको जगन्नाथ मन्दिरको जगैदेखि पुनर्निर्माण भएको छ । झण्डै साढे ५ सय वर्ष पुरानो मन्दिर जीर्ण बन्दै गएपछि महायज्ञको आयोजना गरी सङ्कलित रकमबाट मन्दिरको पुनर्निर्माण गरिएको हो । 

२०६९ सालको फागनु महिनादेखि निर्माण शुरु गरिएको मन्दिरको वरिपरी पर्खाल लगाउने, जगैदेखि ढलान गर्ने, रङरोगन, वाइरिङ, मन्दिरभित्र फिनिसिङ, गजुर राख्नेलगायतका काम सम्पन्न गरिएको मन्दिर निर्माण समितिका अध्यक्ष यामबहादुर बानियाँले जानकारी दिनुभयो ।

 त्यसैगरी मन्दिरको भुइँमा ढुङ्गा छापिएको छ भने गजुर राखेको भागभन्दा तल रङ लगाउने, पिल्लर निर्माण, चारैतिर ढोका तथा झ्याल राखिएको उहाँले बताउनुभयो । मन्दिरको शिरमा तामाको मूल गजुर र ४ चोसामा चारवटा पित्तलको सुनौलो रङका गजुर काठमाडौंदेखि ल्याएर राखिएको छ । 

भौगोलिक विकटता, बाटोघाटोको असुविधा, कच्चापदार्थ समयमा उपलब्ध नहुनु, ढुवानीको समस्याजस्ता कारणले मन्दिर निर्माणकार्य तोकिएको समयभन्दा ढिलो हुन गएको अध्यक्ष बानियाँले बताउनुभयो । आगामी मंसिर मसान्तसम्म पुनर्निर्माण गरिएको जगन्नाथ मन्दिरको उद्घाटन गर्ने तयारी रहेको उहाँको भनाई छ ।

 मन्दिर शिखर शैली एवं काठमाडौंको पाटन, त्रिपुरेश्वर र भारतको उडिसा राज्यमा अवस्थित कृष्ण तथा जगन्नाथ मन्दिरको आकार र शैलीमा निर्माण गरिएको निर्माण समितिका सचिव निलकण्ठ शर्माले बताउनुभयो । गएको वैशाख १२ र २९ गते आएको विनाशकारी भूकम्पले जगन्नाथ मन्दिरमा भने कुनै क्षति भएको छैन ।

र मन्दिरमा दैनिक पूजा आराधनाका लागि आवश्यक पानीको अभाव भएको गाजनेबासीको भनाई छ । त्यसैगरी जगन्नाथ मन्दिरनजिकै गुफा रहेको र त्यस डिलबाट म्याग्दी जिल्लाका ३६ ओटा गाविस नाङ्गो आँखाले सिधा अवलोकन गर्न सकिने भएकाले गाजनेलाई पर्यटन क्षेत्रका रुपमा विकास गर्नुपर्ने उनीहरुको माग छ ।