काठमाडौं, साउन १२– प्रमुख चार दलको
बैठकले नागरिकता र धर्मबारे नागरिकले दिएका सुझावका आधारमा मस्यौदा
परिमार्जन गर्ने निर्णय गरेका छन् । मंगलबार बिहान प्रधानमन्त्री निवास
बालुवाटारमा बसेको बैठकले सुझावका आधारमा नागरिकता र धर्मको व्यवस्थालाई
परिमार्जन गर्ने निचोडमा पुगेका हुन् ।
मस्यौदामा कुनै व्यक्तिको जन्म हुँदाका
बखत निजको आमा र बाबु नेपाली नागरिक रहेको अवस्थामा मात्र नागरिकता पाउने
प्रस्ताव गरिएको छ । चार दलको बैठकले आमा वा बाबुमध्ये एकजना नेपाली नागरिक
भए पनि नागरिकता दिने व्यवस्था गर्ने निर्णय गरेको एकीकृत माओवादीका
उपाध्यक्ष नारायणकाजी श्रेष्ठले जानकारी दिनुभयो ।
त्यस्तै, चार दलबीच धर्म निरपेक्षा
शब्दलाई मस्यौदाबाट हटाउने पनि सहमति भएको छ । तर, निरपेक्षाको ठाउँमा कुन
शब्द राख्ने भन्नेबारे कुरा मिलिसकेको छैन । नागरिकले दिएका सुझावलाई
संविधानमा समेट्न दलहरुमाथि दबाब पर्दै आएको छ ।
चार दलले १६ बुँदे सहमति तथा संविधानको
मस्यौदाप्रति असन्तुष्ट दलहरुसंग भोलि छलफल गर्ने भएका छन् ।
संविधानसभाभित्रै रहेका संघीय समाजवादी फोरम नेपाल, सद्भावना, तराई मधेस
लोकतान्त्रिक पार्टीले जारी प्रक्रियाप्रति असन्तुष्टि जनाउँदै संविधासभाको
बैठक नै बहिष्कार गर्दै आएका छन् ।
Post a Comment