नेपालको सम्पत्तिको प्रदर्शनी

काठमाडौं, भदौ १९ – बिहीबार नेपालको सम्पत्ति नामको परम्परागत कला प्रदर्शनीको उदघाटन गर्न आयोजक सबै तयारी पुरा गरेर बसेका थिए । हातमा कलात्मक बुट्टा कुँदिएको चाँदीको पानस लिएर  ट्रफि मास्टर भनेर चिनिने वरिष्ठ कलाकार चिनकाजी ताम्राकार प्रदर्शनीस्थलमा पुग्नुभयो ।

उहाँले पानस प्रदर्शनीको लागि भनेर नै विशेष किसिमले बनाउनुभएको भन्नुभयो । आयोजकले उहाँले बनाउनुभयो पानसलाई नै प्राथमिकता दिए ।  प्रमुख अतिथि उपप्रधानमन्त्री प्रकाशमान सिंहले ८४ वर्षका कलाकार ताम्राकारले बनाएको नयाँ पानसमा  बत्ती बालेर प्रदर्शंनीको उद्घाटन गर्नुभयो । पानसका कलात्मक बुट्टा उपप्रधानमन्त्री सिंहकी श्रीमतीलाई औधी मन परेछ । प्रदर्शनी अवलोकन गरेर फर्किएपछि पानसको मूल्य कति पर्दछ भनेर उहाँले टेलिफोनमार्फत सोध्नुभएको आयोजक नेपाल हस्तकला महासंघका उपाध्यक्ष एवम हस्तकला डिजाइन तथा विकास समितिका सभापति धर्मरत्न शाक्यले बताउनुभयो ।

उहाँ मात्रै होइन, प्रदर्शनीमा सहभागी हुने जो कोही पनि कलाकारको सीपलाई प्रशंसा गरेर मात्र फर्कने गर्दछन् । बगंलादेशका राजदूत मास्फी विन्ते शाम्स पनि शुक्रबार आर्ट काउन्सिल पुग्नुभयो । नेपाली कलाकाहरुको सीप देखेर छक्क पर्दै नेपालको परम्परागत हस्तकलालाई बंगलादेशमा लैजानको लागि रुची देखाउनु भयो । प्रदर्शनीमा राखिएका धेरै सामग्रीहरु हिन्दु र बौद्ध दर्शनसँग सम्वन्धित भएकोले बंगलादेशमा लैजान अप्ठेरो पर्दछ कि भनेर आयोजकले भन्दा पनि उहाँले कलाकारिता धर्म भन्दा पनि माथि भएकोले त्यस्तो समस्या नपर्ने बताउनु भयो ।परम्परागत कलामा प्रदर्शनीमा दर्शकहरुको सहभागिता बढ्न थालेको छ । गएको बिहीबारदेखि शुरु भएको प्रदर्शनीमा दैनिक १ हजारको हाराहारीमा दर्शकहरुको सहभागिता रहेको छ । प्रदर्शनीमा हस्तकला महासंघबाट सम्मानित भएका १४ जना वरिष्ठ परम्परागत कलाकारले बनाएका सिर्जना राखिएका छन् । वरिष्ठ कलाकार बालकृष्ण तुलाधर, भीम शाक्य, चैत्यराज शाक्य, चिनकाजी ताम्रकार , धर्मराज शाक्य , दीपक जोशी, लोक चित्रकार, महेन्द्र शाक्य, प्रचण्ड शाक्य, राजकुमार शाक्य, शान्त कुमार शाक्य, उदय चरण श्रेष्ठ र कालु कुमालेले बनाउनुभएका धातुकला, प्रस्तरकला, पौभाकला, थ्वज्या माज्या  लगायतका हस्तकलाका सामग्री राखिएका छन् । 

त्यस्तै हस्तकला महासंघबाट विभिन्न समयमा पुरस्कृत ११ जना नवोदित कलाकारहरुले बनाउनु भएका हस्तकलाका सामग्रीहरु राखिएका छन् । कलाकारहरु अमिर शाक्य , दिपक राज शाक्य, दिलिप राज बज्राचार्य , फत्तेज्योति शाक्य , राम प्रकाश श्रेष्ठ, शेर बहादुर महर्जन, सिद्धार्थ शाक्य ,सुन्दर बज्राचार्य , विनोद शाक्य , चन्द्र मान शाक्य र चन्द्र मान शाक्यका सामग्रीहरु राखिएका छन् ।   

१२ औं शताब्दीमा नेपालका कलाकार अरनिकोले तिब्बतमा गएर गोल्डन पेगोडा बनाएर नेपाललाई अन्तर्राष्ट्रियस्तरमा चिनाएका थिए । नेपालमा अहिले पनि धेरै कुशल कलाकारहरु छन् । अहिले पनि विदेशीहरु उपत्यकाको गल्ली गल्लीमा कलाकार खोज्नको लागि नेपाल आउने गरेको कलाकारहरुको अनुभव छ । तर नेपालमा भने कलाकारको सीपको खासै सम्मान नभएको उनीहरु गुनासो गर्छन् । अहिलेको प्रदर्शनीमा पनि विभिन्न देशका राजदूतहरु तथा कुटनैतिक नियोगका प्रतिनिधि सबैजसो पुगेका छन् । तर सरकारी निकायका प्रतिनिधि भने निमन्त्रणा पठाए पनि नपुगेको अनुभव आयोजकसँग छ । साँच्चै परम्परागत कलाकार नेपालको सम्पत्ति हो कि होइन भनेर हेर्नको लागि पनि प्रदर्शनीमा सहभागी हुन आयोजकले अनुरोध गरेका छन्  । प्रदर्शनी बबरमहलमा रहेको आर्ट काउन्सिलमा सोमबारसम्म चल्नेछ ।