देशका बिभिन्न ठाउँमा केही दिनअघिदेखि नै
मस्यौदाबारे अन्तक्र्रिया भैरहेका छन् । सरकारले सुझाव संकलनलाई राष्ट्रिय
अभियानकै रुपमा अघि बढाउँदै आज र भोलि सार्वजनिक बिदा दिएको छ । सुझाव
संकलन हुने ठाउँमा सुरक्षा व्यवस्था कडा बनाइएको छ । राप्रपा नेपाल तथा
मधेश केन्द्रित केही दलले सुझाव संकलनमा भाग नलिने घोषणा गरिसकेका छन् ।
गाउँठाउँमा केही दिनदेखि नै संविधानको मस्यौदामाथि चर्चापरिचर्चा सुरु
भैसकेको छ ।
सुझाव संकलनका लागि समय कम भएको र वर्षा
तथा खेतीपातीको सिजन भएकाले धेरैको सहभागिता कम हुने देखिएको छ । यस्तै आम
नागरिकले दिएको सुझाव संविधानमा समेटिनेमा पनि आशंका गरिएको छ । तर
संविधानसभा सचिवालयले भने नागरिकको सुझाव समेट्नकै लागि देशव्यापी अभियान
चलाइएको जनाएको छ । नागरिक सम्बन्ध तथा संविधान सुझाव समितिले चुस्त र
व्यवस्थित रुपमा काम गरिरहेकाले सबैका सुझाव संविधानमा समेटिने प्रतिवेदन
लेखन उपसमितिका संयोजक प्रेमबहादुर गिरीले बताउनुभयो ।
संविधानमा नागरिकले फोन वा इमेल गरेर पनि
सुझाव दिने व्यवस्था मिलाइएको छ । सचिवालयमा हिजोसम्म साढे १२ हजार भन्दा
धेरै सुझाव संकलन भैसकेको छ । आज जस्तै भोलि पनि देशभर सुझाव संकलनको काम
हुनेछ । संविधानसभा सचिवालयमा भने पर्सि ५ गतेसम्म सुझाव पठाउन सकिनेछ ।
दलीय सहमति विपरीतका सुझाव
संविधानसभा सचिवालय र बिभिन्न जिल्लामा
यसअघि भएका अन्तक्र्रियामा प्राप्त केही सुझाव दलीय सहमति र संविधानको
मस्यौदामा प्रस्तावित विषयभन्दा फरक देखिएको छ । संघीयता, शासकीय स्वरुप,
निर्वाचन प्रणाली, धर्मनिरपेक्षता, मौलिक अधिकार लगायतका विषयमा नागरिकबाट
फरक सुझाव आएको हो ।
धेरै नागरिकले ८ भन्दा कम प्रदेश बनाउन,
सीमांकन र नामांकन टुंग्याउन, राष्ट्रपति र वडाध्यक्ष प्रत्यक्ष चुन्ने
व्यवस्था गर्न, समानुपातिक निर्वाचन प्रणाली खारेज गर्न, हिन्दू राष्ट्र
कायम गर्न लगायतका सुझाव दिएका छन् । मुख्य तीन दलले भने पार्टीको
एजेण्डामा सुझाव दिन कार्यकर्तालाई निर्देशन दिएका छन् । नेपाली कांग्रेस,
नेकपा एमाले, एकीकृत नेकपा माओवादी लगायतका दलले १६ बुँदे सहमतिको आधारमा
सुझाव दिन कार्यकर्तालाई निर्देशन दिएका हुन् ।
सहभागी हुन अपील
प्रधानमन्त्री सुशील कोइरालाले संविधानको
प्रारम्भिक मस्यौदामाथिको छलफलमा भाग लिन सबैलाई आग्रह गर्नुभएको छ ।
प्रधानमन्त्री कोइरालाले मस्यौदाप्रति नागरिकको धारणा बुझ्ने प्रयास आधुनिक
र उच्च लोकतान्त्रिक अभ्यास भएकाले सबैलाई आफ्नो सुझाव दिन आग्रह
गर्नुभएको हो ।
उहाँले मस्यौदामा निहित धारा र
प्रावधानलाई कस्तो बनाउदा उपयुक्त हुन्छ भन्ने विषयमा आफ्ना ज्ञान र
अनुभवमा आधारित भएर सुझाव दिन स्वदेश तथा विदेशमा रहेका सबैलाई अनुरोध
गर्नुभएको छ ।
कोइरालाले संविधानसभामा प्रतिनिधित्व
गर्ने र बाहिर रहेका राजनीतिक दललाई पनि रचनात्मक सुझाव दिएर संविधान
निर्माणको महायज्ञमा सहभागी हुन आह्वान गर्नुभएको छ । मुख्य दलका शीर्ष
नेताहरु, संविधानसभाका अध्यक्ष र सभासदहरुले पनि सुझाव संकलन अभियानमा
सक्रिय सहभागी हुन सबै नेपालीलाई आग्रह गरेका छन् ।
Post a Comment