सुर्खेत, भदौ ३ – अखण्ड मध्यपश्चिमका लागि
छुट्टाछुट्टै रुपमा विरोध प्रदर्शन गर्दै आएका सुर्खेतका राजनीतिक दल
संयुक्त रुपमा आन्दोलन गर्न सहमत भएका छन् । नेपाल पत्रकार महासंघ सुर्खेत
शाखाको सहजिकरणमा भएको छलफलपछि १२ राजनीतिक दल संयुक्त रुपमा आन्दोलन गर्न
सहमत भएका हुन् ।
मध्यपश्चिमलाई छुट्टै प्रदेश र त्यसको
राजधानी सुर्खेतमा कायम गर्न माग गर्दै दलहरुले १२ दिनदेखि छुट्टाछुट्टै
रुपमा विरोध प्रदर्शन गर्दै आएका थिए । साझा नारा र साझा मुद्दा सहित माग
पुरा नभएसम्म विरोध प्रदर्शन जारी राख्ने दलहरुले प्रतिवद्धता जनाएका छन् ।
उनीहरुले आन्दोलनका लागि ‘हाम्रो साझा
एकता, अखण्ड मध्यपश्चिमका लागि प्रतिवद्धता’ भन्ने मुल नारा तय गरेका छन् ।
अखण्ड मध्यपश्चिम कायम गर्नुपर्ने, अवैज्ञानिक सीमांकन खारेज गर्नुपर्ने,
आन्दोलनमा ज्यान गुमाएकालाई शहिद घोषणा गर्नुपर्ने, घटनाको न्यायीक छानविन
आयोग गठन गर्नुपर्ने, घाइतेको निःशुल्क उपचार गर्नु पर्ने लगायतका माग अघि
सारेका छन् । आन्दोलनलाई अझै सशक्त बनाउनका लागि सबै राजनीतिक दलहरु
सल्लाहकार रहेको नागरिक संघर्ष समितिको पुनर्गठन गरिएको छ ।
वरिष्ठ संयोजकमा देवेन्द्र विसी र उद्योग
वाणिज्य संघका क्षेत्रीय अध्यक्ष पदमबहादुर शाही कार्यकारी संयोजक रहेको १
सय ५१ सदस्यीय समिति संघर्ष समिति पुनर्गठन गरिएको छ ।नेपाली कांग्रेस,
नेकपा एमाले, एकीकृत माओवादी, संघीय समाजवादी फोरम, फोरम लोकतान्त्रिक,
राप्रपा, राप्रपा नेपाल, राष्टिय जनमोर्चा, नेकपा मसाल, नेकपा¬—माओवादी,
नेकपा माओवादी र समाजवादी जनताबादीले साझा प्रतिवद्धता जनाएका छन् ।
Post a Comment