ललितपुर, साउन २३ – स्कुल बसका चालकले
जथाभावी चलाएर दुर्घटना बढ्न थालेको भन्दै ललितपुर ट्राफिक प्रहरीले विशेष
अभियान थालेको छ । स्कुल बसका चालक र सहचालकका लागि ट्राफिक नियम सम्बन्धी
कक्षा सुरु गर्न लागिएको ललितपुरका ट्राफिक प्रहरी निरीक्षक सिताराम
हाछेतुले जानकारी दिनुभयो । उहाँका अनुसार शनिबारदेखि ललितपुरका सबै
स्कुलमा पुगेर कक्षा लिने तयारी छ ।
विद्यार्थीलाई स्कुल र घर ओहोरदोहोर
गराउँदा बसको ढोका खुलै राख्ने, चालकले जाँडरक्सी खाएर गाडी चलाउने, तीव्र
गतिमा र जथाभावी ओभरटेक गर्ने जस्ता समस्या देखिएकाले यसलाई नियन्त्रण गर्न
अभियान थालिएको हाछेतुले बताउनुभयो । स्कुलको काम सकिने बित्तिकै अरु
यात्रु ओसार्न हतार गर्ने प्रवृत्तिले दुर्घटना हुने गरेको उहाँको भनाई छ ।
गएको १० गते ज्ञानोदय स्कुलको बसले पुल्चोकमा मोटरसाइकललाई ठक्कर दिँदा एक
किशोरको ज्यान गएको थियो ।
दुर्घटना कम गराउन चालकलाई कक्षासँगै
पार्किङ व्यवस्थित गर्ने काम पनि सुरु हुने हाछेतुले बताउनुभयो । ललितपुरका
मुख्य सडकमा स्कुल बसका लागि छुट्टै बिसौनी राख्ने तयारी भएको उहाँले
जानकारी दिनुभयो ।
Post a Comment