‘रियल मड्रिड छोडेर खुशी हुनै सक्दिन’

भदौ १ – सर्जियो रामोसले आफूले  कहिल्यै पनि रियल मड्रिड छोड्न नचाहेको बताएका छन् । इंग्लिस क्लब म्याचेस्टर युनाइटेडले रामोसलाई भित्र्याउन चाहेको भएपनि उनले रियल मड्रिडसँग सोमबार पाँच वर्षको नयाँ सम्झौता गरेका छन् ।

सम्झौतापछि बोल्दै रामोसले आफ्नो मुटु रियल मड्रिडमा रहेकाले कहिल्यै पनि क्लब छोड्न नचाहेको बताए । स्पेनका डिफेन्डर रियल मड्रिडमा खुशी नरहेको खबर आइरहेका थिए । यहीबीचमा गएको जुनमा म्यानचेस्टर युनाइटेडले रामोसलाई भित्र्याउन २८ दशमलव ६ मिलियन पाउण्ड स्टर्लिङको प्रस्ताव गरेको थियो । तर त्यो प्रस्ताव रामोसले अस्विकार गरेका थिए । 

रियलसँगको नयाँ सम्झौतापछि बोल्दै रामोसले भने ‘सम्झौता नविकरण हुन केही समय लाग्यो तर मेरो मुटु र दिमाग सँधै रियलमै हुनेछ । त्यसैले रियललाई छोडेर म खुशी हुनै सक्दिन ।’ उनले अघि भने ‘मेरो विचारहरु सँधै यही हुनेछन् । म मेरो खेल जीवन रियलबाटै अन्त्य गर्न चाहान्छु यदी रियलले मलाई विश्वास गरेमा ।’

नयाँ सम्झौता गरेसँगै २९ वर्षका रामोस अब सन् २०२० सम्म रियलमा नै बस्ने छन् । रामोस सन् २००५ मा सेभिल्लाबाट रियल मड्रिड आएका थिए । रामोसले अहिलेसम्मको रियल बसाइमा तीन पटक ला लिगा, दुई पटक कोपा डेल रे तथा एक पटक च्याम्पियन्स लिगको उपाधि क्लबलाई जिताउनमा योगदान दिएका छन् । रियलबाट उनले अहिलेसम्म ३ सय ४५ खेलमा ५५ गोल गरेका छन् । स्पेनको राष्ट्रिय टिमबाट खेल्ने रामोसले स्पेनलाई सन् २०१० को विश्वकपको उपाधि दिलाउन पनि महत्वपूर्ण भूमिका खेलेका थिए । उनले स्पेनको राष्ट्रिय टिमका लागि १ सय २८ खेलमा १० गोल गरेका छन् ।

– एजेन्सीको सहयोगमा