धुर्मुस–सुन्तलीले ६७ लाखमा २० वटा घर बनाएर भूकम्प पीडितलाई दिए

 काभ्रे, साउन  भूकम्पपछिको पुनर्निर्माणका लागि सरकार अझै प्राधिकरण गठन गर्न नसकिरहेको बेला एक कलाकार जोडीले भुकम्प पीडितका लागि घर बनाएर हस्तान्तरण गरेका छन् ।

वैशाख १२ गतेको भुकम्प र त्यसपछिका परकम्पले क्षतिग्रस्त काभ्रेको पाँचखल नगरपालिका १६ को पहरी गाउँमा चर्चित हास्य कलाकार सिताराम कट्टेल धुर्मुस र कुन्जना घिमिरे सुन्तलीले नमुना बस्ती नै निर्माण गरेका हुन् ।

 २० घरको एउटा वस्ती नै बनाएर उनीहरुले शहरी विकास मन्त्री नारायण खड्काको हातबाट बुधबार भूकम्प पीडितलाई हस्तान्तरण गरेका हुन् । ७० दिनअघि उनीहरुले यहाँ घर निर्माण गर्न थालेदेखि नै हेर्न आउनेको घुईचो समेत लागेको थियो । सधैं हसाउने यी कलाकारहरुको अथक प्रयासले पहरी गाउ अहिले सवैको आकर्षणको केन्दविन्दु वनेको हो । 

धुर्मुस र सुन्तलीसँगै मेरी बास्सै युनिट, भद्रगोल युनिट र सगुन डटकमको सहयोगमा धुर्मुस सुन्तली एकिकृत वस्ती निर्माण सम्पन्न भएपछि २० घरका ६५ जनाले लाभ पाएका छन । ७० दिन लगाएर कुल ६७ लाख ३६ हजार ८ सय ३६ रुपैयाँ लगानी गरेर १६ रोपनी क्षेत्रफलमा तयार पारिएको यो वस्तीका प्रत्येक घरमा ३ वटा कोठा छन् । हरेक घरमा बाथरुम, धारा, डिस होम, वत्ती, फुलाबारी छ । साथै वस्तीका लाग  ५ वटा गोबर ग्याँस प्लान्ट राखिएको छ । 

यो गाउँमा आउँदा दिनमा पर्यटन तथा सुटिङ युनिटको पनि आँखा लाग्ने आशा छ हास्य कलाकार धुर्मुसलाई । यो नमुना वस्तीलाई व्यवस्थाप गर्दै नेपालका अन्य ठाउँमा पनि यस्ता बस्ति निर्माण गरेर भुकम्प प्रतिरोधात्मक सुरक्षित बसाईको आभाष गराउनु आफूहरुको जिम्मेवारी ठान्छिन् सुन्तली । काभ्रेको ऐतिहासिक मन्दिर पलाञ्चोक भगवतीमा फुलपाती चढाउन फूल उत्पादन गर्ने पहरी समुदायलाई यी घर हस्तान्तरण गर्ने समारोहमा बुधबार मन्त्रीसँगै नेपालका ख्याती प्राप्त कलाकारहरु पनि उपस्थित थिए ।