मकवानपुर, साउन २३ - हेटौडा
अस्पतालमा टिटानस विरुद्धको औषधी अभाव भएपछि उपचारमा समस्या भएको छ ।
अस्पतालमा सुईको माध्यमबाट लगाईने औषधी नहुँदा समस्या भएको हो । टिटानस
ईम्युनोग्लोबुटिन नामको औषधी अभाव हुँदा हेटौडाको बसामाडी बस्तिपुरका दिनेश
चेपाङका १५ दिनका छोराको उपचार हुन नसकेको अस्पतालले जनाएको छ ।
सरकारी
अस्पतालमा निःशुल्क उपलब्ध हुनुपर्ने औषधी काठमाडौका अस्पतालमा मात्र
उपलब्ध गराउने र जिल्ला अस्पतालहरुमा उपलब्ध नगराउँदा समस्या भएको हेटौडा
अस्पतालका डाक्टर हरिबहादुर खड्काले बताउनुभयो ।
टिटानसको सुई निजी क्षेत्रका मेडिकलमा
खरिद गर्न ४० हजार रुपैँया लाग्छ । तर आर्थिक अभावका कारण खरिद गर्न नसक्दा
शिशुको उपचारमा समस्या भएको आमा रोषनी चेपाङले बताउनुभयो । गर्भ अवस्थामा
आमाले टिटानसको सुई नलगाएको र शिशु जन्मने वित्तिकै खिया लागेको ब्लेडले
नाभी काटेर नबाँधेकाले पनि टिटानस भएको डाक्टर खड्काले जानकारी दिनुभयो ।
चार दिनदेखि हेटौडा अस्पतालमा भर्ना भएका शिशुलाई काठमाण्डौ रिफर गर्दा पनि
परिवारले आर्थिक अभावका कारण लैजान नसकेपछि हेटौडा अस्पतालमा सामान्य
उपचार भैरहेको छ ।
आईसियुमा राखेर टिटानसको उपचार
गराउनुपर्ने भएपनि आर्थिक अभावका कारण देखाउँदै परिवारले काठमाडौ लैजान
नसकेपछि समस्या भएको हो । हेटौडा अस्पतालमा आईसियु पनि नभएपछि उनलाई
काठमाण्डूको कान्ति बाल अस्पतालमा लैैजान अस्पताले भनिसकेको छ । तर
काठमाडौं लान पैसा नभएकाले बरु शिशुलाई घर लैजाने तयारी गरेपछि हेटौडा
अस्पतालमै सामान्य उपचार भईरहेको स्वास्थ्यकर्मीहरु बताउँछन् । तर उनको
अवस्थामा सुधार हुन सकेको छैन ।
दिनेश चेपाङका यी छैटौ सन्तान हुन् । यसअघि चार जना छोरा र एक छोरी छन् ।
Post a Comment