अखण्ड मध्यपश्चिमको माग गर्दै सुर्खेतका दल सडकमा

सुर्खेत,  साउन २८ अखण्ड मध्यपश्चिम र त्यसको राजधानी सुर्खेत हुनुपर्ने माग राख्दै सुर्खेतका दलहरु पहिलोपटक सडक सघंर्षमा उत्रेका छन् । काँग्रेस, एमाले, एकीकृत माओवादी, राष्ट्रिय जनमोर्चा, नेपाल मजदुर किसान पार्टी लगायतका दहलहरुले विहान वीरेन्द्रनगरमा र्रयाली निकालेका छन् ।

काँग्रेस, एमाले र एकीकृत माओवादीले संयुक्त रुपमा र अन्य दलहरुले छुट्टाछुट्टै र्रयाली निकालेका हुन् ।  र्रयालीपछि भएको सभामा दलका नेताहरुले मध्यपश्चिमलाई सातौं प्रदेश र त्यसको राजधानी सुर्खेतलाई घोषणा नगर्दासम्म शान्तिपूर्ण आन्दोलन गर्ने उदघोष गरेका छन् । यसअघिका आन्दोलन हिंसात्मक भएको उल्लेख गर्दै दलहरुले अब पार्टीको झण्डामुनी हुने आन्दोलनमा सहभागी हुन नेता कार्यकर्ता लगायतलाई निर्देशन दिएका छन् । पार्टीको कार्यक्रममा बाहेक अरु अन्दोलनमा सहभागी हुने कार्यकर्ताको जिम्मा नलिने उनीहरुले चेतावनी दिएका छन् । दलहरुले आन्दोलनका क्रममा ज्यान गुमाएका ३ जनालाई शहिद घोषणा गर्नुपर्ने, परिवारलाई १० लाख रुपैंया राहत दिनुपर्ने, घाइतेहरुको निःशुल्क स्वास्थ्य उपचार गर्नुपर्ने र घटनाको निस्पक्ष छानबीन गरी दोषीमाथि कारवाही गर्नुपर्ने माग पनि गरेका छन् । 

सोमबारदेखि सुरु भएको प्रदर्शन कायमै रहँदा सुर्खेतको जनजीवन कष्टकर बन्दै आएको छ ।