अख्तियारको डरले खोप कार्यक्रम रोकियो

गोरखा, भदौ २१ - सरकारले भूकम्प प्रभावित १४ जिल्लामा सञ्चालन गरेको दादुरा रुबेला खोप कार्यक्रमबाट गोरखाका ७ गाविसका बालबालिका बञ्चित हुने भएका छन् । जिल्लामा तीन चरणमा खोप कार्यक्रम सञ्चालन गरिएको थियो । यस क्रममा उत्तरका ७ सहित १५ गाविसमा भदौ २३ देखि २८ गतेसम्म खोप कार्यक्रम हुन लागेको थियो ।  ती गाविसमा खोप सामग्री पुुर्याउन हेलिकप्टर प्रयोग गर्नु पर्ने भएपनि बालस्वास्थ्य महाशाखाका अधिकारीहरु हेलिकप्टर प्रयोग गर्न डराएपछि खोप कार्यक्रम पछि सरेको हो । 

त्यस क्षेत्रमा जाने एकमात्रै पैदल बाटो अर्थात मनासलु पदमार्ग भुकम्पपछिको पहिरोका कारण बन्द भएको छ । अहिले ती गाविस पुग्ने एक मात्रै साधन हेलिकप्टर हो । यसअघि असार दोस्रोहप्ता पोषण सप्ताह मनाउने क्रममा जिल्ला स्वास्थ्य कार्यालयका अधिकारी सहितको टोली पनि हेलिहप्टर चढेर ती गाविसमा पुगेका थिए । त्यस क्रममा उनीहरुले सिर्दिवास गाविसमा कडा कुपोषण भएका बालबालिकाको उपचार केन्द्र समेत स्थापना गरेका थिए । 

तर हेलिकप्टर प्रयोग गरेको विषयमा  केही सञ्चारमाध्यममा प्रकाशित समाचारलाई आधार बनाएर अख्तियारले सोधपुछ गरेको भन्दै बाल स्वास्थ्य महाशाखाले खोप कार्यक्रम स्थगित गर्न भनेको वरिष्ठ जनस्वास्थ्य प्रशासक महेन्द्रध्वज अधिकारीले बताउनुभयो । अख्तियारले चासो देखाउनु जायज भएपनि त्यसैलाई आधार बनाएर खोप कार्यक्रम पर सार्नुपर्ने अवस्था नरहेको उहाँको भनाई छ । बालस्वास्थ्य महाशाखाले पैदलबाटो खुलेपछि मात्रै खोप कार्यक्रम सञ्चालन गर्न भनेको अधिकारीले बताउनुभयो । तर यो पदमार्ग तत्काल खुल्ने सम्भावना नरहेको जिल्ला दैवी प्रकोप उद्धार समितिले जनाएको छ । 

जसका कारण  जिल्लाको विकट उत्तरी क्षेत्रका  सिर्दिवास, ल्हो, प्रोक, बिही, छेकम्पार, चुम्चेत र सामागाउँ गाविसका ३ सय बढी बालबालिका दादुरा रुबेला तथा पोलियोको खोप पाउनबाट बञ्चित भएका छन् । हिउँद लागेपछि चिसो धेरै बढ्ने भएकाले अब कहिले खोप कार्यक्रम सञ्चालन हुने भन्ने यकिन नभएको जिल्ला जनस्वास्थ्य कार्यालयले जनाएको छ । जिल्लाको ४५ गाविस र २ नगरपालीकामा भने खोप कार्यक्रम सञ्चालन भैसकेको छ ।