बाँके, भदौ १८ – बाँकेको नेपालगन्जमा गोली
लागेर प्रहरी हवल्दार देवबहादुर पाण्डेको ज्यान गएपछि उहाँको परिवार शोकमा
डुबेको छ । शुक्रबार बिहान एक्कासी श्रीमानको ज्यान गएको खबर सुन्नासाथ
उहाँकी श्रीमती पार्वती बेहोस हुनुभएको छ । अचेत भएपनि उहाँलाई अस्पताल
भर्ना गरिएको छ ।
श्रीमानको ज्यान गएको खबर पत्याउननै
नसक्नु भएकी उहाँ घरी घरी होसमा आउने र बर्बराउने गरेको नातेदार ठाकुर
पाण्डेले बताउनुभयो । पार्वतीसँगै १२ वर्षका छोरा सुगम र ६ वर्षका सुमन पनि
अस्पताल नै छन् । सानै उमेरमा बुबा गुमाएका दुवै बालकको आँखाबाट आँसु
रोकिएको छैन ।
शान्ति विद्या निकेतनमा सुगम कक्षा ६ र
सुमन युकेजीमा अध्ययनरत छन् । ईलाका प्रहरी कार्यालय मैनापोखर बर्दियामा
कार्यरत प्यूठान धर्मावती–४ का प्रहरी हवल्दार पाण्डेको परिवार नेपालगञ्ज–१
धम्बोझीमा बस्दै आएको छ । पाण्डे १८ वर्षअघि नेपाल प्रहरी सेवामा प्रवेश
गर्नुभएको हो ।
घटनाबारे जानकारी पाएपछि पाण्डेको परिवार,
आफन्त र स्थानीय बासिन्दा नेपालगन्ज शिक्षण अस्पतालमा जम्मा भएका छन् ।
मध्यपश्चिम क्षेत्रीय प्रहरी प्रमुख डिआइजी केशवप्रसाद अधिकारीले शुक्रबार
बिहान बर्दियाको मैनापोखरमा प्रहरी र प्रदर्शनकारीबीच झड्प भएको र त्यस
क्रममा नजिकै रहेको मकैबारीबाट प्रहरीमाथि गोली प्रहार भएको बताउनुभयो ।
काठमाडौंबाट गुलरियाका लागि छुटेका दुई
वटा रात्रीबसलाई बन्दकर्ताले आगजनी र तोडफोड गर्न खोजेपछि सदरमुकाम
गुलरियाबाट थप बल ल्याएर शुक्रबार बिहान सवारी साधन सकुशल गन्तव्यमा
पु¥याइएको र सदरमुकामको टोली फिर्ता भएपछि प्रहरीमाथि नजिकै रहेको
मकैबारीबाट गोली हानिएको उहाँले बताउनुभयो ।
यसबारेमा थप अनुसन्धानका लागि विशेष
प्रहरी टोली परिचालन गरिएको छ । प्रहरी हवल्दार पाण्डेको दायाँ खुट्टाको
तिघ्रामा गोली लागेको छ । गोली लागी घाइते पाण्डेको उपचारकाक्रममा शिक्षण
अस्पताल नेपालगञ्जमा ज्यान गएको हो ।
Post a Comment