राप्रपा नेपालले सुझाव संकलन बहिष्कार गर्ने

काठमाडौं, असार २८ - राष्ट्रिय प्रजातन्त्र पार्टी नेपालले संविधानको मस्यौदामा जनताको सुझाव लिने कामलाई बहिष्कार गर्ने जनाएको छ । पार्टी संसदीय दलको सोमबार बसेको बैठकले सुझाव संकलनको कामलाई नाटकको संज्ञा दिएको छ ।
सुझाव संकलनका लागि छुट्याइएको छोटो अवधि र हतारले जनताले दिएको सुझाव भावी संविधानमा कुनै स्थान नपाउने संभावना नरहेकाले त्यसमा सहभागिताको कुनै अर्थ नहुने बैठकको निष्कर्ष रहेको सह प्रवक्ता मोहन श्रेष्ठले बताए ।
राप्रपाले संविधानसभालाई रबर स्टाम्पको रुपमा प्रयोग गरिएको, संविधानका अन्तर्वस्तुहरुमा प्रयाप्त छलफल हुन नदिइएको, नियमावली निलम्बन, संविधान मिच्ने र सर्वोच्च अदालतको अन्तरिम आदेशको अवज्ञा गरी मस्यौदा तयार गरिएकोमा बिरोध जनाएको छ ।
प्रक्रिया र मस्यौदाप्रति सैद्धान्तिक असहमति जनाउँदै उक्त दलले सुझाव संकलनका लािग कम्तीमा एक महिनाको अवधि कायम गरिनुपर्ने माग गर्दै संविधानसभाको बैठकमा हतारमा सुझाव संकलन कार्यको विपक्षमा मतदान गरेको थियो ।
संसदीय दलको बैठकपछि जारी प्रेस विज्ञप्तीमा सुझाव संकलनका निमित्त साउन ५ र ६ गते जम्मा तीन घण्टा समय छुट्याएकोबाट त्यसले जनताको आँखामा छारो हाल्ने नाटक मात्र रचिएको स्पष्ट भएको उल्लेख गरिएको छ । वर्षाको समय र खेतीपातीको मध्य मौसममा निर्वाचन क्षेत्रको एक स्थानमा मात्र जनमत संकलनको कार्यक्रम राखिएकोबाट जनताको उत्साहपूर्ण सहभागितन नहुने उक्त पार्टीको निष्कर्ष रहेको जारी विज्ञप्तीमा जनाइएको छ ।